Ekugcineni, asevaliwe ama-etolls aseGauteng

Abashayeli bezimoto baseGauteng ngeke besakhokhiswa ngokusebenzisa imizila ebikhokhiswe wuhlelo lwama-etoll kusukela ngo-12 wasekuseni ngoLwesihlanu. 

Lokhu kumenyezelee ungqongqoshe wezokuThutha uSindisiwe Chikunga. 

Lolu hlelo lwethulwa yi-South African National Roads Agency (i-SANRAL) emzamweni wokubuyisela imali eyayibolekiwe ngohlelo lokuthuthukisa imimgwaqo enguthelawayeka eGauteng ngo-2013.

UChikunga uthe uhlelo lolu seluchithiwe ngokusemthethweni. 

“Kusasa (ngoLwesine), mhla ka-11 kuMbasa ka-2024 ngo-23:59:59, abasebenzisi bomgwaqo ngeke besakhokhiswa ngokusebenzisa imizila ye-etoll yaseGauteng. 

“Ukukhala kwe-tag uma udlula gaphansi kwamasango e-toll kuzogcina phakathi kwamabili ngomhla ka-11 kuMbasa 2024. 

“Amalambu namakhamera uzoqhubeka ngezinhloso zokuphepha emgwaqeni nokulwa nobugebengu,” usho kanje.

Nokho abasakweleta kusazomele bakhokhe. “Ngokomthetho abashayeli basabophekile ukuthi bakhokhe.

“Kodwa kusazodingidwa ukuthi lokhu kuzolandelwa kanjani, uma kunezingqinamba wudaba esizolubhekisisa. 

“Kunomthetho okhona njengamanje othi uma usebenzisa umgwaqo okhokhelwayo, kumele ukhokhe.”

Khonamanjalo, undunankulu waseGauteng, uPanyaza Lesufi, uthe indaba yokukhokhwa kwezikweletu inzima.

Uyaphika ukuthi wake wathembisa abashayeli ukuthi bazobuyiselwa imali abayikhokha ngalolu hlelo. 

“Isissusa sengxabano ngaama-etolls kwaba ukungaxoxisani. Ngakho-ke ukukhokhwa kwezikweletu kumele kuxoxiswane ngakho.

“Abantu ngeke bathi sithatha isinqumo ngaphandle kokubonisana. Sizobonisana. 

OLUNYE UDABA: Yenze kakhulu iFord ngeRanger Wildtrak X

“Kukhona ithimba lochwepheshe esizolisungula, ngakho-ke ngemuva kokubonisana okufanele sizokwenza isimemezelo,” kusho yena.