Ifike ngamandla i-Everest ebangisana neFortuner kuma-SUV

IFord neToyota sekunesikhathi besembangweni wokudayiswa kwezimoto zabo ezingamaveni iRanger neHilux. 

Kodwa uma kuziwa embangweni wezimoto ezingama-SUV, iToyota ibizidlela amahlanga ngeFortuner yayo. 

Nokho iiFord Everest namanje yiyona esasondela ekufakeleni iToyota Fortuner umncintiswano kulesi sigaba sezimoto. 

Khona ke kodwa akungabazeki ukuthi kungabanzima kumuntu oneFortuner ukuthi ayiyeke, athathe i-Everest. 

Lokhu kungenzeka yize ngokwamandla nokwakhiwa kwalezi zimoto zakamuva, iFortuner isalele ngemuva. 

Kodwa cishe nayo iFord seyikwamukele lokhu. Cishe manje sebebheke ukwakhela labo abafuna into ehlukile. 

IFord Everest XLT ishaya ngo-154 kW/500 Nm, 2.0-litre bi-turbo wenjini kadizili, esebenza ngogiyabhoksi onamagiya ayishumi. 

Le moto inabo bonke ubukhazikhazi bezimoto zesimanje futhi nasemgwaqeni inamathela kamnandi. 

Idayisa kusukela ku-R913 400 kanti uma ufuna into eyehlukile, iyona moto ekufanele impela le. 

Le ntengo ifaka neminyaka emine yewaranti, noma amakhilomitha angu-120 000 nosizo lweminyaka emihlanu uma kwenzeka ikulimalela emgwaqeni.