UToyota uzihole phambili ngokuthengwa
Naphezu kokuba kuminyene utshumo embonini yezimoto kwaToyota South Africa Motors (TSAM) basayibambe ngakho.
Ngenyenga edlule uMay le nkampani ikwazile ukubamba umgqigqo ekudayisweni kwezimoto ezintsha.
Bese kuyihlandla lesihlanu kulandelana ukuthi uToyota uphumelele ukuvikela irekhodi lawo.
Le nkampani idayise izimoto ezingu 10 330 ngoMay okwenze imarket share yabo yafinyelela ku 22.8%.
Ngokwezibalo ezikhishwe yiNational Association of Automobile Manufacturers of South Africa (Naamsa) zingu 45 308 izimoto ezintsha ezidayisiwe.
Kulesi sibalo izimoto ezilinganiselwa ku 88,45 zithengwe amadealer.
Njengoba bekulindelekile izimoto ezincane yizo ezidayiswe ukwedlula ngo 31 741.
Kulesi sibalo izimoto ezingu 6 397 bekungezakwaToyota.
Ezimotweni ezisesigabeni esibizwa ngelight commercial, amaveni, amakhumbi isibalo sibe ku 10 938.
Izimoto eziphakathi nendawo namaloli izibalo zokuthengwa kwazo zibe ngu 1 969.
“Izibalo zokudayiswa kwezimoto ngoMay zikhombisa ukuthi kungani iToyota South Africa Motors sekuphele iminyaka engu 45 izihola phambili.
Ukugcina leli rekhodi kudinga ukusebenza kanzima, ukuziphatha ngendlela nokuphokophela phambili okuyinto abasebenzi bethu abayibeka phambili.
Siyaziqhenya ngomsebenzi owenziwe abasebenzi bethu,” kusho uLeon Theron onguVice President kwaSales and Marketing.
Uqhuba uthi njengoba muva nje ingazange yenyuswe inzalo yemali mboleko wethemba ukuthi maningi amakhasimende amasha abazowathola.
NgoMay phakathi kwezimoto zakwaToyota ezidayise kahle kukhona iCorolla Cross (1629), Starlet (1039), neStarlet Cross (694).
IToyota Fortuner ifinyelele ku 679. AmaLexus kudayiswe angu 109, angu 46 kuwo awohlobo lweLexus GX. Kuze kube yimanje iveni elisahamba phambili ngokudayiswa iToyota Hilux.
